الإحساس بالأمان هل هو حقيقة أم تخيلات؟؟؟

الإحساس بالأمان هل هو حقيقة أم تخيلات؟؟؟


الإحساس بالأمان ده أجمل حاجة فى الدنيا وقد أيه الواحد بيكون تعيس ووحيد ومكتئب من غيره ، الواحد دايما بيحب يحس بالأمان فى كل مكان هو موجود فيه فى بيته ، فى شغله ، فى مكان دراسته ، ومع كل الناس إل حواليه يعنى مع أهله وأصحابه وحبايبه .


شىء رائع أن الواحد يحس بالأمان وخصوصا من أقرب الناس له لأن بجد الواحد من غير أمان بيسيطر عليه كل الأفكار السيئة مش بس كده لأ ده كمان تصرفاته مبتكونش فى أوقات كتير متزنة أو مظبوطة ،يعنى الواحد ميخدش عليه، لأن الإحساس بعدم الأمان بيصيب الواحد بالوحدة ودى أصعب حاجة فى الدنيا.


عارفين ياجماعة الإحساس بالأمان مش صعب أوى ، لإن أحنا ممكن نحس بالأمان من مجرد كلمات أو نظرات حنينة أو وجود حضن دافىء وحنون نترمى عليه وقت الشدة ووقت الخوف والحزن على أى شىء ومن أى حد، وده ممكن نلاقى مع أى حد فعلا قدر يفهمنا وعارف لحظات الضعف والحزن والحاجة لأن للأسف لو حتى الواحد ليه أصدقاء كتير لكن مش بيطمن لحد فيهم مثلا أنه يحكيلوه أو أنه يفرغ الطاقة الداخلية الى جواه معاه بدون خوف ده ميبقاش أمان على العكس ده فى أوقات كتيرة بيكون عبء على الشخص.


وللأسف فى ناس بتقعد تقول أمان أيه أنتى بتحلمى هو الزمن ده بقى فى أى أمان ولا حد بيحب حد فعلا من غير مصلحة أو بيحافظ على أسرار حد ، ده كله خيال، تفتكروا فعلا ياجماعة للدرجة دى الأمان بقى صعب وللدرجة دى الناس معندهاش شوية وقت للى بيحبوهم وبعدين دى كلها حاجات بسيطة

وصغيرة يعنى مش نتعب اوى يعنى لو سمعنى حد ووقفنا جنبه فى مشكلة ليه وبرده مش هيحصلنا حاجة لما نحاول نفهم الناس إل قريبين مننا ونحاول نحسسهم بالأمان وبالحب معقولة الدنيا بقت بالسوء ده ،

مهو أحنا كمان علشان كده أغلبنا عندهم أكتئاب ومخنوقين وزهقنين من الدنيا علشان مفيش حد واقف جنب حد مع أن كل واحد بيبقاله يوم يعنى إنهاردة هتقف جنبى بكرة هقف جنبك ، هى الدنيا كده لازم أحنا نبدء بالعطاء علشان يوم منحتاج نلاقى . مش كده ولا أيه؟؟؟


مــنـقــول